L'uniun dl sport da Lungiarü é gnüda metüda sö por interessamënt de n
valgügn sportîfs dl paîsc ai 30.11.1980 y cumpedâ 54 scric ite.

Le pröm presidënt ê stè Clara Benedikt y le vizepresidënt Moling Nicolò.

Metü man à l'Uniun dl Sport cun trëi seziuns cun a cé chisc responsabli:
Sport dla liösa - Clara Dominikus
Jüch dl palê - Moling Alfred
Schi - Frenademetz Enrico

Le laûr da scrivan â surantut Clara Clemente y l'inciaria da cassier Moling
Gebhard.

Atualmënter à l'uniun dl sport Lungiarü cinch seziuns:
Jüch dl palê
Sport dla liösa
Schi
Jadiné
Volley-bal

Cina incö à l'U.S. amatoriala Lungiarü albü trëi presidënc:
Clara Benedikt (1980 - 1983)
Clara Dominikus (1983 - 1990)
Nagler Richard (1990 cina al dedaincö)

La maiù tradiziun sportiva god a Lungiarü tres ciamò le sport dla liösa.
Un di pröms a pratiché chësc sport a livel agonistich é stè Clara
Dominikus. Süa pasciun y ligrëza à daidé tignì sö chësta disciplina cina incö.

Al dedaincö vëgn chësc sport pratiché da n grup de mituns y mitans,
respetivamënter da n valgügn jogn y na jona, che tol ince regolarmënter
pert a gares F.I.S.I. y che é ince stà bugn de portè a ciasa val' bun resultat.
inant

L'Uniun dl Sport da Lungiarü é assoziada al V.S.S. (Verband Südtiroler
Sportvereine) y bele dal 1982 incà ala F.I.S.I. (Federazione Italiana Sport Invernali).

Ai 20.07.1997 él gnü inauguré la Ütia dl sport, na infrastotöra sportiva por
döt le paîsc. La ütia, adöm cun le ciamp dl sport, é costruziuns dër aprijiades
spezialmënter da pert di mituns, deache d'isté vëgnel tignì alenamënc dl jüch
dl palê y d'invern vëgnel fat dlacia söl ciamp por jadiné.

N'ater avenimënt de gran importanza por l'uniun dl sport é stada la
costruziun dla pista dles liöses "Do Juvel". Dô plü agn de stüdi y de laûrs
ëra gnüda daurida por le pröm iade tl ann 2002. Ai 29.02.2004 él stè la
benedisciun y inauguraziun ofiziala dla pista naturala por liöses en ocajiun
dl Campionat Provinzial de Liöses sön pista naturala.